SANGUMANG KUMAN JUHU ISIN KUJANG CERITA DONGENG DARI KALIMANTAN TENGAH BAHASA DAYAK NGAJU

 

SANGUMANG KUMAN JUHU ISIN KUJANG

 

Sinde katika Sangomang ewen ndue indange jaton bara balut awi wayah mandang je panjang. Ye hamauh ih indang Sangomang kau dengan Sangomang. Oi, Sangomang, awi ikau tolak talih mamam Maharaja kanih balaku isin kujang mamam akan balut itah andau toh, awi are ampie kabun kujang mamam. “Yoh, indang,” kuan Sangomang tombah.

 

Balalu harikas Sangomang tolak akan Istana Maharaja, palus misek dengan mamae maharaja awi je puna paharin ije kalambutan indange. “Oi, amaku Maharaja tau aku balaku isin kujang akan balut ikei kue indangku andau toh, peteh indangku?” Tombah Maharaja : “ela je isi, batange mahin dia aku manenga akan keton, amon handak kuman isin kujang, imbul kabuat!” Hakarang! Indang, lalehan kakihm nah mama, dengan anak akem” kuan Sanguomang. “Puna ih amon handak tatau”, kuan Maharaja tombah kea.

 

Dengan kapehe atei Sangumang buli, balalu nyarita akan indange narai auh mamae Maharaja. Sanguomang palus dinun akal, balalu ie mansuman akan indange, tirok itong uka manduan isin kujang mamae te.

“Oi, indang, jewu itah tolak akan eka mama Maharaja, indang mumah lontong eka sarangan kujang kareh, aku mampalaya mama bagandang.

 

Amon auh tewah gandangku “pak kapak...bung.....bung....bung...” rimae hindai te. Amon tewah gandang                           kue                   mama               “pak golong.....golong.....                     jawut....jawut... Pak               golong...golong.....

jawut...jawut. ” te wayah indang marukat kujang mama. Kuan Sangomang dengan indange. “yoh

anak kuan indang Sangomang.

 

Sangomang harikas golong manalih human mamae Maharaja mimbit manewah gandang. Narai taloh ati puna kahanjak Maharaja bagandang. Ewen ndue nampara manewah gandang, marasuk auhe hiau, metoh te indang Sangomang tolak akan likut Istana Maharaja mumah lontong sambil sahokan..

 

Dia pire-pire katika hining auh tewah gandang Sangomang dengan mamae Maharaja : “pak...kapak.....bung...bung...bung        ” “Oh, hindai ampie kuan atei indang Sangomang. Dia pire-pire tinai hining tewah gandang : “pak... golong....golong...jawut...jawut...” Ye, te, kuan atei indang Sangomang, sambil golong marukat isin kujang, sampai kontep lontong.....

 

Limbah te buli kan huma indang Sangomang maharagu kujang, batange akan barin bawoi, isie akan juhu hewui pundang saluang. Sangomang paramisi buli kea bara eka mamae Maharaja.

Sana sampai huma Sangomang ewen ndue indange kuman balut juhu isin kujang.” Puna balut mangat resa-resap toto.

 

Limbah kuman Sangomang ewen ndue indange birik lenge marasih awan eka kuman nah. Sangumang palus pehe kanaie, handak mamani, tau haranan juhu basantan indahang tinai awi wayah pandang panjang, riwut papa hirahe. Hancap Sanguomang hadari akan jamban palus mantuhus arepe akan btang talian, tame jamban palus mamani.

 

Narai taloh ati, Sangomang mani mambocor : pruuussssssss.....!!...pruuusss..!! lepah keroh batang danum awi tain Sangomang je mani mambocor nah. Alahan bara keroh tunek awan oloh manyedot amas.

Hung penda danum kanih uras babusau kawan laok. Takana kea rajan tampahas, dia tahan keme danum keruh hayak ewau tai dia kalaluen kuan kawan laok. Kawan laok balaku dengan Sangomang uka tende mamani, haranan lalau kakerouh batang danum te. Sangomang dia olih mampatende tesaue te, juju-juan tai kau prit-pret sinde. Balalu kawan laok pumpong hong ije eka, manirok kilen ampie mampatende tesau Sangumang.

 

Kajariae ewen dinun ije tirok, uka tau mampatende tesau Sangomang, dengan manenga akan Sangomang tisin cintamani, uka ie terai mamani. Tisin te sakti tau malalus narai palaku oloh je mahapae. Uras kawan laok pakat bulat atei. Balalu ewen manalih Sanguomang palus manenga tisin te.

 

Hemben te kea tesau Sangomang candak. Sangomang luompat akan ngambu, buli akan huma, mamasut tisin panengan laok te nah. Sangomang balaku, alem kareh, mendeng ije istana hai tandipah Istana Maharaja. “gup!! Palus mancugut istana je hai tandipah Istana Maharaja, mama Sangomang.

 

Hong hanjewu andau, metoh maharaja misik bara tiroh, ie tarewen sabanen, salenga aton istana hai tandipah istana hai.

“Hau, hau...istana eweh je aton tandipah istana kutoh..? Kuan Maharaja”. Tombah kawan Mantir Raja, “jete Istana ayun Sangomang, je salenga mancugut hamalem endau.” Kuan ewen.

 

Palus Maharaja, harikas, handak manekap mandau, tatekap ladok; handak manekap lunjo tatekap papas, handak manekap dohong tatekap pipis bindang, hakarang uras sala tekap haranan kagugup Maharaja. Palus Maharaja marentah kare parajurit ayue : “Ayo tehau akeku Sangomang manaharep aku hetoh !!”

 

Ye ewen kawan prajurit tolak akan Istana Sangumang, mander parentah Maharaja. Sangomang tolak kea akan Istana Maharaja. Sana sampai, Maharaja manambang Sanguomang mamalus ie tame. Maharaja dia sabar misek Sangomang narai buku sababe salenga aton istana hai ayun Sangomang, labih hai bara Istana Maharaja.

 

“Oi, akenku Sangomang, kilen kesahe ikau tau tatau nyalenga, maka istana ayum toh labih hai bara istanangku?” kuan pisek Maharaja.

“Ceh, mama ela mamparandah arep, magon hai istana ayun mama.” Kuan Sangomang. “Dia aken, hai istana ayum!” kuan Maharaja tinai. “Ander akangku rahasia, aken?” “Ceh, mama, kilau dia katawan, jetoh nah panatau je pelai taliau apangku bihin.” Kuan panombah Sangomang.

 

Maharaja puna juju-juan sinde musuk muneh misek Sangomang. “Ander ih aken, narai karugie ikau mander akan mamam toh?” kuan Maharaja. Hamauh tinai Sangomang : “Terai mama mahin bukih, dia mama manenga akan kue indang balaku isin kujang male.” “Takan, takan aken, laku, laku bei palepah kabun kujangku kau, akan balut keton ndue indangm.” Auh Maharaja mangatau Sangomang.

“Anu, ma, mahamen angatku manyarita akam.” Kuan Sangomang. “Dia narai ih aken, jetoh rahasia kue ih, jaton oloh je mangatawan.” Kuan Maharaja.

Kajariae insanan Sanguomang kea narai buku sababe ie salenga tatau : “Kutoh kesahe nah, ma : “Male nah indangku marukat kujang likut istana toh, metoh kue manewah gandang.” Hakarang, tarewen Maharaja kilen je aku dia katawan?” Kuan Maharaja.

 

Sabar ma, hindai lepah kesahku, kuan Sangomang, haluli manuntung kesah : “Sasadang kakaree, palus indang buli manjuhu isin kujang dengan santan enyoh batue, namean isut pundang saluang. Puna juhu mangat resa-resap toto. Dia katawan narai mawie, salenga pehe kanai limbah kuman, palus aku te, muhun akan jamban, sakalinya mani manesau, puna nampurus sinde, nyamah keruh batang danum toh. Haranan kakeruh batang danum tuntang ewau dia kalaluen, lepah busau kawan laok. Ye ewen kawalan laok je ngapala awi rajan tampahas pakat manenga aku tisin cintamani, uka aku terai mamani. Tuntang tisin te tisin sakti, narai bewei je laku itah uras tau tulus manjadi.

 

Maka bara te aku balaku panatau tuntang istana hai tandipah istana ayun mama toh.” “Oh, kute auh kesah nah aken. Kareh aku marukat kujang aku manampa juhu isin kujang are-are, hayak are santan mangat golong manesau.” Kuan Maharaja. “Ela ma!” kuan Sangomang. “Narai kare ela!” Aku mamam ela sampai kalah panatau bara ikau, aku handak kea balaku tisin cintamani bara rajan tampahas te.” Tuombah

 

Maharaja, palus ie malihi Sanguomang, manalih likut huma, marukat kujang.

Dia mise jam, juhu kujang basantan jari masak, haranan tasang barangai ih gawin maharaja, puna mahimat gulung kuman tuntang goulung manesau.

Pea horeh, dia pire katahie, pehe kanain Maharaja, puna sudu-sudu sinde angate,

 

Maharaja palus mantehus arepe akan batang talihan dia sampet tame akan jamban, puna alahan bara tampurus danum sedot tai maharaja kau nampurak, pruuuuuussss pruuuuussssssssss!!!

Hemben te kea keruh batang danum, alahan bara kakeruh tain Sangomang male, hayak ewau puna jaton tara tanding sinde.

 

Lepah busau nangau kawan laok je aton melai batang danum. “Lalehan kamias tain Maharaja toh” kuan rajan tampahas, puna handak mampatei itah kawan laok toh ampie gawie.

 

Toh ie keme angat balehe kuan rajan tampahas. Parak kasangit atei rajan tampahas mansukap paran Maharaja : “Barrrr!!! Sambar rajan tampahas paran Maharaja. “Kayah!! kayah!!! Kuan Maharaja “matei aku, matei aku nyambar tampahas parangku”. Maharaja lompat bara talian akan istana dia sampet kepan salaware, parak lua-luai sinde. Tara gitan Sangomang, basa Maharaja hadari bara batang talian parak haluai.

 

Sangomang maja Maharaja, tuntang ie hamauh : “Te je kuangku nah ma…, ela ikau manumon taloh gawingku, handak patatau arep, halawu kana sambar param awi rajan tampahas. Indu kahawe-hawen.” Kuan Sangomang. “Ela ikau nyarita akan oloh aken, taloh je mawi aku toh”, kuan Maharaja taharep Sangomang.

 

“Dia, ma, dia balang aku manarung ikau akan oloh are, narai taloh gawim.” Kuan Sangomang. “Ela aken, ela.” Kuan Maharaja nyame-nyame. “Narungku ikau ma…, uju gantang bahataku akan ngawa, uju gantang bahataku akan ngaju. Dia balang aku manarung ikau ma. Pelek teken inuntungku, bakiwak beseiku inambingku, narungku ikau.” Kuan Sangomang.

 

“Ela aken, ela, kareh aku nenga akam bawi jahawen.”kuan Maharaja. “Dia aku ma, akan naraiku, akan sawangku lalau kakaree, akan jipengku ewen te betauku. Narungku ikau ma.” Kuan Sangomang.

 

“Kareh aku nenga akam Putir Busu, ken, asal ikau dia manarung aku.” Kuan Maharaja tinai. Takinyut Sangomang mahining aran Putir busu, palus ie hamauh : “Hau, toto nah ma?” kuan Sangomang. “Toto”. Hau “iyoh, toto” kuan Maharaja. “Te apang, palus aku ih eka batue,” kuan panombah Putir Busu bara karung, sambil kumi-kumi, awi ie puna handak kea dengan Sangomang je bakena balinga.

Pandak kesah, balang Sangomang manarung mamae Maharaja ie palus mangabali arepe dengan Putir Busu, ewen belom sanang landang melai Istana Hai.

 

Peteh Penyang:

1. Sala kea gawin Sangumang ewen ndue indange je manakau kujang maharaja. Keleh mimbul kabuat bele itah manduan atawa balaku ayun oloh, tau oloh dia manenga.

2.  Ela lalau bukih dengan kawan kula, panatau dia imbit matei.

3.  Keleh rajin baimbul kare sayur, lombok, puring betung, tuntang kare batang bua.

4. Amon kuman sasadang ih ela namparuau, tau pehe kanai tuntang tau akan panyakit, kuan dokter.

5.  Ela mangeroh batang danom lepah lumat kareh kawan laok.

6.  Ela bahiri, tuntang mipen ramon oloh. Jete malanggar hukum kasapoloh.