PALANDUK BATANDING
BABINIH DENGAN SANSIBUR
Sinde katika,
palanduk tolak satiar
mangau panginae... heka kea kulam,
dinon babaya akan suang kanai ih. metoh ie sampai saran ije
sungei, ie hasundau dengan sansibur. Kuan sansibur dengan palanduk : "Hau, nger bara kueh
toh?" Tombah palanduk : "eh, bara ngawa kau, manggau panginan akan
galang kanai". Tarewen sansibur palus hamauh tinai : "Hakarang!!
babuah auhe nah nger, kuman kare
tetek batang!" Tombah palanduk : "dia ih, sanger, lehan dia ikau
haratie, tetek tantimun olon kalunen
hong tana kanih, haratim!!" Tombah kea sansibur : "Ela rahas sanger, ihatku mureh ikau".
Hamauh
tinai sansibur dengan palanduk : "Nger, hiningku auh oloh, ikau toh tahan
babinih, toto tenah?" Tombah
palanduk : "Boh, puna gawin aingku
je malayap ije male-malem". Hamauh
tinai sansibur : "En
ikau olih batanding dengangku?" Tombah palanduk : "Ceh, lecakm kau,
kaulim malawan aku!!"
Tombah sansibur : "Ela manawah
aku nger!" "Ayo kue batanding babinih
eweh je helo tantiruh!" Kuan palanduk manantang sansibur. Tombah sansibur : "Ayo, amon kute kahandakm".
Ye
ewen due nampara batanding babinih. Sasar kaput andau, sasar runtuk matan
palanduk, awi heka limbah satiar. Hamauh sansibur dengan palanduk : "En batiruh ikau nger?"
Tombah palanduk : "Dia kare batiruh!".
"Kai", kuan sansibur. "En jadi batiruh ikau nger?" kuan sansibur. "Hindai", kuan palanduk.
Alem
sasar ambo, hamauh tinai sansibur : "En jari batiruh ikau nger?"
Tombah palanduk, parak kantu-kantuk handak ngambutep : "Hindaaaiiii....sangerr....!" "Kai", kuan sansibur. Dia pire palanduk palus takenyep, ngambutep,
tantiruh. Hamauh sansibur tinai : "En, jari batiruh ikau nger?"
Tarewen sabanen
palanduk, palus nangkeru,
hayak tombah : "Hindaiiiiiii..!!!", salenga
hining auh halebung "bung!!! ampie palanduk
manangkeru palus lawu akan sungei. Lepah bisa-luntus ih palanduk. "Kek kek kek. " tatawen sansibur, manantawe palanduk je lawu akan sungei.
Sangit angat atei palanduk:
"Narai je nantawem
sanger, aku nah dia kare mangantuk,
ihat ku handak mandoi, awi tahi dia mandoi!". "Kai, tenah" kuan sansibur,
sambil tatawe tinai : "kek kek kekkk....
Pea kaolih palanduk malawan sansibur
habinih, awi matan sansibur cara rena-renang dia puji ngambutep, jaton upak
matae..... kek kek kekk....
-
